مما لا يعجبني: أن يسأل الرجلُ الشيخَ سؤالا معلوم واقعه؛ فيجيب الشيخ إجابة عامة لا تمت للواقع بصلة -في عمقها التهرب-.
مثال:
إيه حكم الأغاني؟
الشيخ الفاضل قاعد يلت ويعجن بعيد جدا... وابن حزم وابن تيمية وووو
الأخ يا مولانا بيسأل عن أغاني عمرو دياب وحمو بيكا احنا هنستعبط.
الاغاني يا مولانا اللي حضرتك بتسمعها في التكتك حلال ولا حرام؟
يا مولانا السائل أكيد مش بيقصد أغنية لعنترة بن شداد يعني.
----
ما حكم اختلاط البنات في الجامعات والمدارس؟
الشيخ الكريم نفس اللت والعجن، ويقولك أم المؤمنين فعلت، وكان فيه غزوة، وبنت سعيد بن المسيب، وتحريم الوسائل والمقاصد. وحوارات.
يا مولانا بلاش هبل، الله يكرمك، الراجل بيسأل على الجامعة اللي حضرتك عارفها كويس جدا جدا اللي البنات فيها بتذهب بكامل زينتها بعدما خرجت من عند الكوافير، اللي حضرتك قاعد تتفرج على حفلات تخرجها حاليا، اللي مفيش فيها تعليم حقيقي، بمناهج تغريبية، ومدرسين مختلطين وسفر بدون محارم وبيات برة البيت عادة؟ - (لو حابب أفرجك صور للبنات هناك عاملة ازاي ومالو يا مولانا) -
حلال ولا حرام؟
----
السائل: ما حكم أعراس الزفاف؟
مولانا: مَن يستطيع تحريم الفرحة والنبي قال لعبد الرحمن بن عوف أولم ولو بشاة، والإسلام يحث ع السعادة، وكل سعادة في غير معصية نؤيدها، وقد قال الله: {فلنحيينهم حياة طيبة} وقال ابن المنذر في الأوسط..
منذر مين يا مولانا؟
يا مولانا كفاية خبل، انت عارف كويس إن السائل بيسائل عن الأعراس التي تعمل فيها الأغاني حتى مطلع الفجر والعروس والبنات يعرون لحومهم ويرقصون فيها، بل ربما فيها راقصات فعلا، المليئة بالتحرش والدخان والسب والقذف، يا مولانا السائل بيقصد الاعراس اللي مش بنعرف ننام منها.
كفاية لف ودوران.
------
ويوجد عشرات الأسئلة تكون الإجابة من هذا القبيل!.
مولانا الشيخ عارف الجواب كويس بس بيهرب وبيحاول يرميها في حِجر السائل، اللي هو "أنا عرضت عليك الفكرة عند السلف" وشوف انت بقى الصح!.
ربنا يهديك يا مولانا
لا مانع أن يقول الشيخ أعتذر عن الإجابة.
والله أعلم.
#قطوف_حول_البيوت